Чăваш Республикинче кăçал 50 пине яхăн çын пурăнакан ялсенчи культура çурчĕсен пурлăхпа техника никĕсне аталантарма тата çирĕплетме 28,5 миллион тенкĕ уйăрма йышăннă.

Çак укçа-тенке 10 муниципаллă округа куçарса парĕç: Улатăр, Патăрьел, Йĕпреç, Канаш, Куславкка, Пăрачкав, Çĕрпÿ, Çĕмĕрле, Елчĕк, Тăвай округĕсене. Чăваш Енри Культура министерствинче палăртнă тăрăх, асăннă пулăшу вĕсенче культура объекчĕсен инфратытăмне çĕнетсе пыма, учрежденисене кулленхи ĕçре хальхи вăхăтпа килĕшсе тăракан условисемпе тивĕçтерме май парать.

Субсидисен шучĕпе сасă, свет тата сцена оборудованине, сĕтел-пукана, техника хатĕрĕсемпе тивĕçтерессине çĕнетме, пÿлĕмсене юсама, культура учрежденийĕсене унта çÿрекенсемшĕн тата пултарулăх коллективĕсемшĕн хăтлă тума, хăрушсăрлăхпа тивĕçтерме палăртаççĕ.