Республика ертÿçи Олег Николаев пуçарнă «Чăваш Енри хаваслă çу кунĕсем» проектпа тата «Тăван кĕтесĕн культури» партпроектпа килĕшÿллĕн Шупашкар муниципаллă округĕн Чăршкасси ялĕнчи илемлĕ уçланкăра чăвашсен ырă йăли-йĕркипе чаплă уявсенчен пĕри - Акатуй иртнĕ.

Унта Куславкка муниципаллă округри «Энĕш» фольклор ансамблĕ те хăйĕн пултарулăхĕпе паллаштарнă. Чăваш халăхĕн авалхи юррисене юрлакансем хушшинче карачсем лауреат ятне тивĕçлĕ пулнă, вĕсене Диплом парса хавхалантарнă. Ку награда - халăх хисепĕ. Вăл çавăн пекех мăн асаттесен йăли-йĕркине куславккасем çÿллĕ шайра тытса пынине те çирĕплетсе парать.