Виçĕ ачаллă хĕрарăмсем тивĕçлĕ канăва вăйра тăракан пенси çулĕнчен 3 çул маларах – 57 çулта тухма пултараççĕ. Енчен те хĕрарăмăн тăватă ача пулсан, унăн пенсие 4 çул маларах - 56 çулта тухмалли право пур. Пилĕк е ытларах ачаллă амăшĕсем 50 çул тултарсанах тивĕçлĕ канăва кайма пултараççĕ.

Пенсие срокчен тухас тесен нумай ачаллă амăшĕсен ачисене 8 çула çитиччен воспитани памалла, кунсăр пуçне вĕсен 15 çулран кая мар страховани стажĕ тата уйрăм çыннăн пенси коэффициенчĕ 30-тан кая мар пулмалла. Ватлăхра кирлĕ страховани пенсине палăртнă чухне миçе ачи тĕлĕшпе амăшĕн правине туртса илнине шута илмеççĕ.

«Ачана çулталăк çурă тултариччен пăхнă вăхăта хĕрарăм декрета кайиччен е ун хыççăн ĕçленине кура çеç страховани стажне кĕртеççĕ. Срокчен пенси памалла тесе йышăннă чухне миçе ача çуратнине мар, кашни ачине пăхса ÿстернине шута илеççĕ»,- çирĕплетет Раççей Социаллă фончĕн Чăваш Енри управляющийĕ Валерий Николаев.

Стажа шута илнипе пĕрлех хĕрарăмсене пенси коэффициентне шутласа параççĕ. Пĕрремĕш ачине çулталăк çурă тултариччен пăхса ÿстернĕшĕн - 2,7 коэффициент, иккĕмĕшшĕн - 5,4, виççĕмĕшшĕн тата тата ун хыççăн çуралнă пепкисемшĕн амăшне 8,1 коэффициент пама палăртнă.

Пенсипе çыхăннă ыйтусемпе хуравсене «Госуслуги» порталти харпăр хăйĕн счетĕнче, нумай функциллĕ центрăн офисĕнче е Раççей Социаллă фончĕн Чăваш Енри управленийĕнче тĕплĕнрех пĕлме пулать.

А. МЕДВЕДЕВА.