Раççей Федерацийĕнче 1992 çултанпа Пĕтĕм тĕнчери ваттисен кунне паллă тăваççĕ. Çак уяв ылтăн кĕркунне кунĕ-сенче, çутçанталăк пире хăйĕн илемлĕ тĕсĕсемпе савăнтарнă, уй-хирсемпе сад пахчисем тутлă пахча-çимĕçпе сăйланă вăхăтра килет.

Кунерти вăтам шкулта кĕçĕнрех классенче вĕренекенсем тата кунти ача садне çÿрекенсем октябрĕн 1-мĕшĕнче ватлăх енне сулăннă çынсене уявпа саламлама вырăнти Ветерансен çуртне çитсе килчĕç. Унта пурăнакансем вĕсене ăшшăн кĕтсе илчĕç. Ачасем ватăсене чуна çĕклекен юрă-ташăпа савăнтарчĕç, çирĕп сывлăх, вăрăм кунçул сунчĕç. Ветерансем кашни номер хыççăн тăвăллăн алă çупрĕç, час-часах килсе çÿреме ыйтрĕç.

О. АНТИПОВА.