Елчĕкри вăтам шкулта оборонăпа массăллă, спорт тата патриотла ĕçсен уйăхлăхĕ уçăлнă ятпа савăнăçлă линейка иртрĕ.

Вĕренекенсем пĕрле пухăнса йĕркелекен мероприятие хисеплĕ хăна - хĕçпăшаллă çапăçусен ветеранĕ, СВОран вăхăтлăха отпуска килнĕ Андрей Александрович хутшăнчĕ. Унăн хĕрĕ 2-мĕш класра вĕренет.

Мĕн ĕмĕртенпех Раççей вăйлă, хăюллă, хăйĕн Тăван çĕршывне хÿтĕллеме хатĕр çынсемпе палăрса тăнă. Пирĕн умри тивĕç – мăн асаттесемпе аттесен паттăрлăхне яланах асра тытасси, çитĕнекен ăрăва ун çинчен каласа парасси, çĕршывăн хăюллă хÿтĕлевçисем пулма воспитани парасси. Шăпах ĕнтĕ çак тĕллевпе пирĕн шкулта январĕн 23-мĕшĕнчен пуçласа февралĕн 28-мĕшĕччен патриотизм майлă тата спорт мероприятийĕсем иртеççĕ. Уйăхлăх пынине тĕпе хурса 9-мĕш класри çамрăк армеецсен ушкăнĕ ялавсем йăтса тухрĕ, «Пост /1. Возрождение» программăпа паллаштарчĕ.

Январĕн 27-мĕшĕнче, тĕслĕхрен, Ленинград блокадине татнă кун ячĕпе шкулта тĕрлĕ мероприяти иртрĕ. Эпир 5-мĕш класра вĕренекенсемпе пĕрле вăрçă вăхăтĕнчи Ленинградри пĕр пÿлĕмре экскурсире пулса куртăмăр. Унти япаласене шкул ачисем Надежда Николаева советник ертсе пынипе пуçтарнă. Вĕсем çинчен пире 4-мĕш класра вĕренекен Павел Никитин каласа пачĕ.

Н. МОРОЗОВА.