Республикăри куçса çÿрекен флюорографи хатĕрĕпе усă курса пирĕн округра пурăнакан 787 çын хăйĕн сывлăхне тĕрĕслеттерме пултарнă. Вăл пирĕн патра майăн 4-мĕшĕнчен пуçласа 15-мĕшĕччен ĕçленĕ. Çак тапхăрта машиностроени отраслĕнче вăй хуракансем тата 8 территори пайĕнче пурăнакансем унăн пулăшăвĕпе усă курнă.

Куçса çÿрекен флюорографи - хамăр сывлăха меллĕ вăхăтра тата ниçта çÿремесĕрех тĕрĕслеттермелли меслет. Çакна ĕç вырăнĕнче те, пурăнакан çуртран аякка е район больницине каймасăр та тума пулать. «Вăрăм та хастар пурнăç» наци проекчĕ-пе килĕшÿллĕн «Автофургон» ОООра ĕçлекенсем, Тĕрлемес, Энтри Пасар, Елчĕк, Карач, Тĕмшер, Кармăш, Кунер ял тăрăхĕсенче, Куславкка хулин поселок енче пурăнакансем хăйсен сывлăхне çапла майпа тĕрĕслеттерме пултарчĕç.

«Флюорографи - туберкулеза тата ÿпкери организма пысăк сиен кÿрекен шыçăсене тупса палăртмалли меслетсенчен пĕри. Тухтăрсем тĕрĕслевре çулталăкра пĕр хутчен пулма сĕнеççĕ. Флюорографи витĕр тухма ятарласа хатĕ-рленме кирлĕ мар, вăхăт та нумай иртмест - 5 минутран ытла мар», - теççĕ районти И.Е.Виноградов ячĕллĕ тĕп больница специалисчĕсем.

Сывлăх - кашни çыннăн тĕп пуянлăхĕ, çавăнпа харпăр хăйшĕн тăрăшмалла, диспансеризацире тăтăшах пулмалла. Ку вара чир-чĕре пуçламăш тапхăртах тупса палăртма пулăшать. Ахальтен каламаççĕ халăхра: «Организма мĕн чухлĕ маларах сиплеме тытăнатăн, çавăн чухлĕ маларах сывалатăн».

Р. КОВАЛЕВА.